ஊழியத்தைக் குறித்ததான தரிசனம்:

தேவன் நமக்குக் கொடுத்திருக்கிற ஊழியத்தைக் குறித்து நமக்கு தரிசனம் தேவை. அவர் நமக்கு என்ன ஊழியம் கொடுத்திருக்கிறார்? அப்போஸ்தல ஊழியமா? அப்போஸ்தல ஊழியம் உபதேசங்களை கொடுக்கிற ஒரு ஊழியம். ஆங்காங்கே சபைகளை உருவாக்குகிறவன் அப்போஸ்தலன். அவர்களுடைய வேலையெல்லாம் சபை கட்டுகிற ஊழியம். ஏதாவது உபதேசக் குழப்பம் நேரிட்டால், அதை தீர்த்து வைப்பவன் அப்போஸ்தலன்.

அவர்களைக் குறித்து வேதம், "அப்போஸ்தலர், தீர்க்கதரிசி களாகிய அஸ்திபாரத்தின் மேல் கட்டப்படுகிறீர்கள்” என்று சொல்லுகிறது. ஒருவேளை தேவன் உங்களுக்கு தீர்க்கதரிசன ஊழியத்தைக் கொடுத்தால், அதைச் செய்யுங்கள். ஒரு தீர்க்கதரிசி என்பவன் தேவனுக்கும் மனிதனுக்கும் இடையே மத்தியஸ்தனாக நிற்பவன். தேவன் சொல்லுகிறதைக் கலப்பில்லாமல் ஜனங்களுக்குச் சொல்லுபவன். அதே போல, ஜனங்கள் சொல்லுகிறதைக் கலப்பில்லாமல் தேவனிடத்திற்கு சொல்லுவான்.

தீர்க்கதரிசன ங்களில் பல வகை உண்டு. தீர்க்கதரிசியினிடத்தில் குறைந்தது வரங்களாவது செயல்படவேண்டும். ஞானத்தை போதிக்கும் வசனம் எதிர் காலத்தைக் குறித்துச் சொல்லும், அறிவை உணர்த்தும் வசனம் நிகழ் காலம் மற்றும் கடந்த காலத்தைக் குறித்துச் சொல்லும். மூன்றாவது ஆவிகளைப் பகுத்தறியும் வரம், நமக்கு முன்பதாக வருகிற ஆவி எது என்று அறிந்து கொள்ள உதவும். பொல்லாத ஆவிகளை இனம் கண்டு கொள்ள உதவும். பரிசுத்த ஆவியானவரின் செயல்களையும், இயேசு கிறிஸ்துவையும் அறிந்து கொள்ள உதவும். இயேசுவைப் போல, ஒளியின் தூதனைப் போல வேஷமிட்டுக் கொண்டு வருகிற ஆவிகளை இனம் கண்டு கொள்ள வேண்டும். இந்த வரங்கள் இருக்கும்பொழுது அசுத்த ஆவிகள் நடுங்கும்.

நீங்கள் சுவிசேஷகராக இருந்தால் சுவிசேஷ ஊழியம் செய்யுங்கள். ஒரு சுவிசேஷகன், இரட்சிப்பை சுவிசேஷமாய் பிரசங்கிக்க வேண்டும். அவர்கள் சபையை நடத்தும்படி வந்துவிடக் கூடாது. அவர்கள் ஜனங்களை இரட்சிப்புக்குள் நடத்த வேண்டும். மனந் திரும்பாதவர்களை மனந்திரும்பும்படி இரட்சிப்பின் பாதையிலே சுவிசேஷத்தை அறிவிக்க வேண்டும். அவர்களுக்குள் வரங்கள் செயல்படலாம். பெயர் சொல்லி அழைக்கும் வரங்கள் செயல்படலாம். ஆனால் இரட்சிக்கப்பட்ட ஜனங்களை ஆவிக்குரிய சபைகளுக்கு அனுப்ப வேண்டியது அவர்கள் பொறுப்பு.

அடுத்தாக, மேய்ப்பனுடைய ஊழியம். மேய்ப்பன் தன் சபையை அல்லது மந்தையை பாதுகாக்க வேண்டும். அவன் தனக்குக் கொடுக்கப்பட்டுள்ள ஆத்துமாக்களை தன் இருதயத்தில் வைத்து ஜெபிக்க வேண்டும். மேய்ப்பன் பெலவீனமானவைகளை பெலப்படுத்த வேண்டும், நசல் கொண்டதை சரிப்படுத்தி குணமாக்க வேண்டும், காயம் கொண்டதைக் காயம் கட்ட வேண்டும், எலும்பு முறிந்ததை சரிப்படுத்த வேண்டும். ஆகவே மேய்ப்பனுடைய வேலை ஏராளமாய் இருக்கிறது.

அடுத்த ஊழியம் போதக ஊழியம். அவர்கள் வேதத்தின் ஆழங்களைப் பிரசங்கிக்க வேண்டும். ஆழங்களை மாத்திரமல்ல, வேதத்திலுள்ள அனுபவங்களை போதிக்க வேண்டும். அதை அனுபவித்துப் பிரசங்கிக்க வேண்டும். எசேக்கியேல் உன்னதமான ஸ்தலங்களுக்குள் கடந்து சென்றார். எலும்புகள் நிறைந்த பள்ளத்தாக்கிற்கு தேவன் அழைத்துச் சென்றார். அதே போல எருசலேம் தேவாலயத்திற்கு அழைத்துச் சென்றார். ஆகவே அவர்கள் ஆவிக்குரிய அனுபவங்கள் நிறைந்தவர்களாய் இருக்க வேண்டும். அவர்களுக்குள் வேதத்தின் ஆழத்தின் வெளிப்பாடுகள் இருக்க வேண்டும். அவைகளை விசுவாசிகளுக்குக் கலப்பில்லாமல் பிரசங்கிக்க வேண்டும்.

ஆகவே உங்களுக்குக் கொடுக்கப்பட்ட ஊழியத்தைக் குறித்து ஜாக்கிரதையாய் இருங்கள். சபையில் உள்ள மூப்பர்கள், ஆளுகை செய்கிறவர்கள், நிர்வாகிகள், விசுவாசிகள் எல்லோருக்கும் ஊழியம் உண்டு. உங்களுக்கென கொடுக்கப்பட்ட ஊழியத்தை மனமுவந்து செய்யுங்கள். மேலும் உதவிக்காரரின் ஊழியம் என்று ஒன்று உண்டு. அவர்கள் இருநாக்குள்ள வர்களாய் இருக்கக் கூடாது. தங்களுடைய ஊழியத்தை நன்றாகச் செய்தால் அவர்களுக்கு நித்தியமான நல்ல நன்மைகளைக் கர்த்தர் கொடுப்பார். அவர்களை நித்திய ராஜ்யத்திற்குள் சேர்த்துக் கொள்வார். ஆகவே ஊழியத்தைக் குறித்ததான தரிசனத்திலே நாம் ஜாக்கிரதையாய் இருக்க வேண்டும்.

1984ம் ஆண்டு, தேவன் எனக்கு ஒரு பெரிய தரிசனத்தைக் கொடுத்தார். என்னுடைய ஊழியம் உலகளாவிய ஊழியம் என்று கூறினார். ஆனால் நான் அதைக் குறுக்கிக் கொண்டேன். என் ஊழியத்தை ஒரு சிறிய அளவிலேயே செய்தேன். ஆனால் தேவன் விடவில்லை. உலக அளவிற்கு அந்த ஊழியத்தை அவர் கொண்டு வந்தார். தேவன் செய்ய நினைத்தக் காரியங்கள் தடைபடாது. நம் தேவன் பெரியவர். உங்களைக் கொண்டு எதை செய்ய வேண்டுமென்று விரும்புகிறாரோ, அதை அவர் செய்து முடிப்பார்.

'நான் பெலவீனன்' என்று சொல்லாதிருங்கள் (யோவேல் 3:10). "பலவீனனும் தன்னை பலவான் என்று சொல்வானாக". காரணம், (பிலி. 4:13) "என்னைப் பெலப்படுத்துகிற கிறிஸ்துவினாலே எல்லாவற்றையும் செய்ய எனக்கு பெலனுண்டு".

தொடரும் .....