உசியாவின் கோபம்

உசியாவும் இதேபோல கோபப்பட்டான். என் அன்பு தேவனுடைய ஊழியக்காரர்களே! இந்தக் கோபத்தினால் எத்தனை ஊழியங்கள் உடைந்து போயிருக்கிறது என்று உங்களுக்குத் தெரியுமா? எத்தனை ஊழியக்காரர்கள் இந்த கோபத்தினால் தங்கள் ஊழியத்தை இழந்திருக்கிறார்கள் தெரியுமா? தேவ ஜனமே! நாம் பொறுமையாயிருப்போம், தாழ்மையாயிருப்போம். மாம்ச சிந்தைகளை அகற்றிப்போட்டு, ஆவியின் சிந்தையாகிய தாழ்மையை அணிந்து கொள்வோம் . இந்தப் பெருமையின் ஆவியை உங்களுக்குள் வரவொட்டாதிருங்கள். தேவன் உங்களுக்கென்று பெரிய ஊழியத்தை வைத்திருக்கிறார். பரலோகத்தில் உங்களுக்காக உயர்ந்த ஸ்தானத்தை வைத்திருக்கிறார். ஆகவே உங்களுக்காக தேவன் வைத்திருக்கிற ஊழியத்தை இழந்து விடாதிருங்கள். தேவன் உங்களுக்கென்று எந்த ஊழியத்தைக் கொடுத்திருக்கிறாரோ அதை பொறுமையாய், தாழ்மையாய் செய்யுங்கள். தேவன் வரும்பொழுது பிரதிபலனைக் கொண்டு வருவார். இயேசு, "இதோ சீக்கிரமாய் வருகிறேன். அவனவனுடைய கிரியைகளின்படி அவனவனுக்கு நான் அளிக்கும் பலன் என்னோடேகூட வருகிறது" என்று சொன்னார்.

உங்களுடைய கிரியைகளுக்குத் தக்க பலன் வரும். தூதர்களோடு ராஜாதி ராஜா வரப்போகிறார். எல்லா தேவ தூதர்கள் மத்தியிலும், எல்லா பரிசுத்தவான்கள் மத்தியிலும், உங்களுடைய தலையிலே தேவன் உங்களுக்கு முடிசூட்டும்பொழுது உங்களுக்கு எப்படியிருக்கும். இந்த வாடாத கிரீடத்துக்காக நாம் உழைப்போம். பூமியிலே நமக்கு பாடுகள் உண்டு, உபத்திரவங்கள் உண்டு, ஆனால் நாம் இந்த உபத்திரவங்களுக்கும் பாடுகளுக்கும் சவாலாயிருப்போம். இயேசு கிறிஸ்து சவாலாயிருந்தார். அடிகளைக் கண்டு அவர் பயப்படவில்லை. முள்முடியைக் கண்டு அவர் பயப்படவில்லை. சிலுவையைக் கண்டு அவர் அஞ்சி ஓடவில்லை. இயேசுவுக்கு அந்த வேளை வந்தபொழுது எருசலேமை நோக்கி தன் முகத்தைத் திருப்பினார். ஆவிக்குரிய வைராக்கியத்தோடு புறப்பட்டார். அவருடைய உபத்திரவங்களினால், சிலுவையிலே அவர் பட்ட பாடுகளினால், கோடிக்கணக்கான ஜீவன்கள் நித்திய ராஜ்யத்திற்குள் போகும். உங்களுக்கு ஏற்படுகிற பாடுகளினால் அநேக ஆத்துமாக்கள் ஆதாயமாகும். தேவ ஜனமே! நாம் பொறுமையாயிருப்போம். தாழ்மையாயிருப்போம். கர்த்தர் நமக்குரியதான பிரதிபலனைக் கட்டளையிடுவார்.

ஆனால் இந்த உசியாவுக்கோ பொறுமையில்லை. இவ்வளவு ஆசீரவாதங்களையும், உயர்வையும் கொடுத்திருக்கிறாரே என்று அவன் பார்க்கவில்லை. அவனுக்கு கேடுண்டாகும் மட்டும் அதிக மேட்டிமை இருந்தது. தூபங்காட்டும்படியாய் உள்ளே புறப்பட்டுப் போனான். மிகுந்த கோபமடைந்தான். மாம்ச வைராக்கியம் கொண்டான். கடைசியாக நடந்த காரியம் என்னவென்றால் தேவன் அவனுடைய நெற்றியிலே குஷ்டம் பிடிக்கும்படியாகச் செய்தார். அப்பொழுது அவனே அந்த தூபத்தைக் கீழே போட்டுவிட்டு ஓடினான். அவனுடைய மரணபரியந்தம் ஒரு தனிமையான வீட்டிலே தரித்து, குஷ்டரோகியாகவே வாழ்ந்து மரித்துப்போனான்.

தொடரும் .....

அடுத்ததாக,"உடைக்க முடியாத டைட்டானிக் (Unbreakable Ship)" என்பதை பார்ப்போம்...